Еуропада аптап ыстықтан 10 мыңнан астам адам көз жұмды
EuroMOMO еуропалық өлім-жітімді бақылау бағдарламасының дерегіне сәйкес, маусым айының соңында Еуропаны жайлаған аптап ыстықтан 10 мыңнан астам адам қайтыс болған. Зерттеу мәліметінше, оның 9 мыңы – 65 жастан асқан егде адамдар.
Астана, NEGE. Бұл жөнінде Deutsche Welle хабарлады.
EuroMOMO зерттеуінің авторлары Еуропаның 27 елінің ұлттық статистикасын жинақтаған. Жоба жекелеген елдер бойынша нақты мәліметтерді жарияламағанымен, маусымның соңғы аптасында «өте жоғары өлім-жітім» Франция мен Бельгияда тіркелгені атап өтілген.
Бір Германияның өзінде маусым айының соңына дейін елде аптап ыстықтан шамамен 5 100 адам қайтыс болған. Оның ішінде 4 310 адам тек 22-28 маусым аралығындағы ерекше ыстық аптада көз жұмған. Ыстықтан қайтыс болғандардың 80 пайыздан астамы 75 жастан асқандар. Қайтыс болғандардың арасында ерлерге қарағанда әйелдер көп тіркелген. Бұл деректі Роберт Кох (RKI) институтының мамандары жариялады.
Англия мен Уэльсте маусым айының соңындағы ыстықтан шамамен 2 700 адам көз жұмған. Ыстықтан қайтыс болғандарды анықтау бойынша зерттеуді Лондондағы Империялық колледж, Ұлыбританияның Метеорологиялық қызметі және Лондон гигиена және тропикалық медицина мектебі бірлесіп жүргізген.
Осы ғылыми топтың есебіне сәйкес, аптап ыстық толқыны Еуропаның 12 ірі қаласында шамамен 2 300 адамның өмірін қиған.
Қазір оқып жатыр
Тарихи триумф: қазақстандық оқушылар халықаралық физика олимпиадасында бес алтын иеленді
Тапанша, гранатаатқыштар мен пулеметтер: Қазақстанда қаруды заңсыз өткізудің 52 арнасы жойылды
Тоқаев–Трамп диалогы: Қазақстан үшін қандай жаңа мүмкіндіктер ашылады?
ҰҚК соңғы төрт жылда 10 террорлық әрекетті тоқтатқан
