Еуропа жаңа туристік маусымға дайын емес
Еуроодақ елдері ковид-төлқұжаттарды – вакцинацияланған немесе COVID-19-бен ауырған адамдар үшін бірыңғай сертификаттарды келісу және енгізу бойынша бір мәмілеге келе алмай отыр.
Алматы, NEGE. Бұл туристік маусымның басталуына кері әсер етуі мүмкін. Одақ ретінде нақты шешім шығарылмағандықтан, әр ел мәселені өздігінен шешуге мәжбүр, - деп хабарлайды tourdom.ru сайты. Bloomberg мәліметінше, қазір Еуропалық комиссия саяхатшылардың денсаулығы туралы барлық ақпаратты тіркеуге мүмкіндік беретін бірыңғай цифрлық платформаны құру жұмыстарын жүргізіп жатыр. Алайда бұл үш айдан төрт айға дейін созылуы мүмкін. Себебі тек жүйені дамыту процесінде емес, сондай-ақ осындай сертификаттарды заңды рәсімдеуге байланысты мәселелерде де қиындықтар туындап отыр. Экономикасы туризмге тәуелді елдер ковид-төлқұжат енгізілгенін қолдайды.
Алайда, ЕО-ның бірнеше елі, соның ішінде Бельгия мен Франция ковид-төлқұжатын енгізуге қарсы. Ал ЕК басшысы Урсула фон дер Ляйен комиссия мүшелері бұл мәселе жан-жақты талқылайтынын мәлімдеді. Ол мұндай құжатты айналымға енгізу «медициналық қажеттілік» деп есептейді.
