Еуроодақ заңсыз мигранттарды Қазақстанға аттандыруы мүмкін
Еуропарламент 17 маусымда Еуроодақтан баспана сұрау өтініші қабылданбаған, бірақ отандары оларды қабылдаудан бас тартқандықтан, еліне қайтару мүмкін болмай отырған заңсыз мигранттарды үшінші елдерге депортациялаудың жаңа тәртібін мақұлдады.
Астана, NEGE. Жаңа регламентте мигранттарды ЕО аумағынан тыс жерлерде ұстау орталықтарын құру және заңсыз мигранттарға қатысты санкцияларды күшейту қарастырылған, деп жазады Deutsche Welle.
Құжатқа сәйкес, мұндай адамдарды үшінші елдерде орналастыратын арнайы орталықтарға жіберу көзделген. Әзірге мұндай «қайтару хабтарының» нақты қай жерде құрылатыны белгісіз. Ықтимал нұсқалардың қатарында Африка елдері, Қазақстан және Өзбекстан аталған.
Әзірге мұндай орталықтарды өз аумағында орналастыруға нақты қай елдер келісім беретіні белгісіз. Қазіргі уақытта Қазақстан мен Өзбекстан билігі бұл жобаға қатысты ресми мәлімдеме жасаған жоқ. Өз кезегінде Еуроодақтан серіктес елдерге даму бағдарламаларына қолдау көрсету немесе визалық режимді жеңілдету сияқты ұсыныстар жасалуы мүмкін.
