Еуразиялық қаржы компаниясы айналасындағы дауға Муниса Шодиева араласты
Еуразиялық банк пен «Еуразия» сақтандыру компаниясы кіретін Еуразиялық қаржы компаниясы айналасындағы жанжал өрши түсті.
Алматы, NEGE. Компания сайтында жарияланған мәліметке сәйкес, үш отбасы – Ибрагимовтар, Машкевичтер және Шодиевтердің әрқайсысы 33% акцияға иелік етеді.
Алматының экономикалық соты ЕҚК директорлар кеңесінің мүшесі, Патох Шодиевтің қызы Муниса Шодиеваның талап-арызын өндіріске қабылдады. Ол директорлар кеңесінің екі мүшесі Шухрат Ибрагимов пен Андрей Коповтың әрекетіне наразылығын білдіріп, олардың шешімдерін заңсыз деп тануды және күшін жоюды талап еткен.
Муниса Шодиева, Фото: ғаламторданСонымен қатар, ЕҚК-ның өзі де Ибрагимов пен Коповқа қарсы осындай талаптармен қарсы талап-арыз берген.
Bloomberg агенттігінің дерегінше, Eurasian Resources Group артында тұрған үш отбасы қаржы секторындағы активтерін сату мәселесінде келісе алмаған. Белгілі болғандай, Freedom Holding Corp. бұл активтерді 1 млрд долларға сатып алуды ұсынған. Алайда Шухрат Ибрагимов бұл мәмілеге қарсы шығып, оны тоқтату үшін Алматы сотына талап-арыз берген.