«Ethno5» тобы алғаш рет ән кешін өткізді
6 өнерпаздан құралған топтың құрылғанына бүгінде - 3 жыл. Ұлттық аспаптардың сүйемелдеуімен заманауи әндерді орындайтын ұжым «Апамның ертегілері» атты жобаның арқасында танысқан.
Ұлттық аспаптарымызбен заманауи музыка бір арнада тоғысты. Бұған себепші болған «Ethno5» ұжымы. Жас өнерпаздардан құралған топ қаламыздың арт кеңістіктерінің бірінде алғашқы кештерін ұйымдастырды.
Бүгінде халықтың жеңіл музыканы тез қабылдап, сапалы музыкаға сұраныстың төмендеп кеткені рас. Сондықтан болар «Ethno5» тобы бірден сахнаға ұмтылмай, 3 жыл бойы тасада жұмыс жасаған. Жарнаманың аздығынан жеңіл дүниелердің арасынан халыққа таныла алмай жүрген олар авторлық әндерін тыңдауға әуес жандардың қатары көп екенін айтады. Өнерпаздар ұлттық аспаптардың жастар арасында кең таралғанын қалайды. Әрі осы бағытта аянбай еңбек етуге дайын.
Ендеше, «ұлттық музыкадан ұлтымыздың исі сезіліп тұру керек» деген топ мүшелеріне шығармашылық табыс тілейміз!