Ескертуді елеместен Таяу Шығысқа кеткен қазақстандықтар жауапқа тартыла ма?
Сыртқы істер министрінің орынбасары Әлібек Қуантыров Мәжіліс кулуарында журналистердің ескертуге қарамастан Таяу Шығыс елдеріне кеткен Қазақстан азаматтарына қатысты сұрағына жауап берді.
Астана, NEGE. Оның айтуынша, қазіргі таңда қақтығыс аймағында болған қазақстандықтардың басым бөлігі эвакуацияланған.
«Жағдай күн сайын өзгеріп жатыр, эвакуацияға өтініш берушілер саны көбеюде. Әрине азаматтарға алдын ала ескерту жасалды. Соған қарамастан БАӘ-ге кеткен бірнеше жүз адам жауапкершілікті өз мойнына алады», – деді вице-министр.
Сонымен қатар ол ескертулерді елеместен қауіпті аймаққа кеткен қазақстандықтарға айыппұл салынбайтынын айтты.
Айта кетейік, 11 наурызда Сыртқы істер министрлігі Таяу Шығыс аймағынан 9517 қазақстандық елге қайтарылғанын, Бахрейн, Израиль, Иордания, Иран, Кувейт, Ливан және Оман елдерінен эвакуациялық іс-шаралар аяқталып келе жатқанын хабарлады.