Есірткі затын заңсыз сақтаған адам 4 жылға сотталды
Шымкенттік тұрғын есірткі затын заңсыз сақтаған.
Алматы, NEGE. Шымкенттік тұрғын саябақтардың бірінде серуендеп жүріп, полиэтилен пакетіне оралған өзіне тән хош иісі бар, дәріге ұқсас зат тауып алады. Шымкент қаласы полиция департаментінің баспасөз қызметінің мәліметінше, азамат бұл затты тез арада полицияға өз еркімен өткізбестен, алдағы уақытта оны тұтыну немесе сату мақсатында өзіне қалдырған.
«Арада уақыт өте жолда белгісіз азаматтармен жанжалдасу барысында Әл-Фараби ауданы Полиция басқармасының учаскелік инспекторы ажыратып, ерегіскен азаматтарды полиция басқармасына жеткізеді. Ер адамдардың жеке басын анықтау барысында бірінен 32 дана полиэтилен пакетіне оралған өзіне тән хош иісі бар психотропты затқа ұқсайтын зат анықталып, тәркіленеді. Тиісті сараптама қорытындысымен қалташалардағы заттың салмағы 16 граммға жуық болатын психотропты зат пирролидиновалерофенон екені дәлелденді», – делінген мәліметте. Ұсталған азамат өз кінәсін толық мойындаған. Аталған дерек бойынша ер адам ҚР Қылмыстық кодексінің 296-бабы 4-бөлігімен (Есірткі заттарын аса ірі мөлшерде заңсыз сақтау) 4 жылға бас бостандығынан айырылды.