Есірткі сатқан зейнеткер 10 жылға сотталды
2021 жылғы желтоқсанда Өскемен-1 станциясында Желілік полиция қызметкерлері есірткіні заңсыз сақтау және өткізу күдігі бойынша Өскемен қаласының бұрын сотталған 63 жастағы тұрғынын ұстады. Бұл туралы Көліктегі полиция департаментінің баспасөз қызметі хабарлайды.
Алматы, NEGE. Құқық бұзушының жұмыс орнын, тұрғылықты жерін және тізгіндеген автокөлігін тінту кезінде жалпы салмағы 9 келіден асатын ораулы күйде аса ірі мөлшердегі «кептірілген марихуана» есірткісі тәркіленді. Аталған факті бойынша көлік полицейлері ҚР ҚК 297-бабы (Есірткі заттарын аса ірі мөлшерде өткізу мақсатында заңсыз сақтау және тасымалдау) бойынша сотқа дейінгі тергеу жүргізді. Биылғы жылдың 12 мамырында ШҚО қылмыстық істер жөніндегі ауданаралық мамандандырылған сотының үкімімен құқық бұзушы қасақана аса ауыр қылмыс жасағаны үшін кінәлі деп танылып, 10 жылға бас бостандығынан айырылды. Еске сала кетейік, жыл басынан бері еліміздің көлік полицейлері есірткі құралдарының заңсыз айналымына байланысты 155 есірткі қылмысын анықтады, оның 15-і – өткізу, 8-і – аса ірі көлемде сақтау фактілері. Заңсыз айналымнан 28 келіден астам түрлі есірткі құралдары тәркіленді.
