Ерлан Қожағапанов бостандыққа шықты
Бұрынғы мәдениет және спорт вице-министрі Ерлан Қожағапанов колониядан мерзімінен бұрын босатылды.
Астана, NEGE. Қылмыстық-атқару жүйесі комитеті сот оның жазасының өтелмеген бөлігін айыппұлға ауыстырғанын хабарлады. Айыппұлдың мөлшері айтылған жоқ.
Ерлан Қожағапанов 2025 жылғы мамырда үш жылға бас бостандығынан айырылған еді.
Тергеу мәліметінше, ол коммерциялық ұйымның мүддесін көздеп, 2018 жылы Петропавлда өткен Қазақстан мен Ресейдің XV өңіраралық ынтымақтастық форумындағы көрмені өткізу туралы келісімнің сол компаниямен жасалуына ықпал еткен.
Форум шығынының сметасы негізсіз екі есе ұлғайтылған. Соның салдарынан бюджет қаражаты тиімсіз жұмсалып, келтірілген залал 1 млрд теңгеге бағаланған.
