ERG-дегі мемлекеттің үлесін енді «Самұрық-Қазына» басқарады
Бұған дейін Eurasian Resources Group (ERG) компаниясындағы 40 пайыздық мемлекеттік акциялар пакетін Қаржы министрлігі басқарып келген еді.
Астана, NEGE. «Самұрық-Қазына» қорының баспасөз қызметі ақпаратты растады.
«2026 жылғы 4 тамызда Қазақстан Республикасы Үкіметінің шешіміне сәйкес ERG компаниясының 40 пайыздық мемлекеттік акциялар пакеті «Самұрық-Қазына» АҚ-ның меншігіне өткенін хабарлаймыз», – делінген Қордың NEGE-ге берген жауабында.
Сондай-ақ Қор өкілдері активті беру «Самұрық-Қазына» АҚ-ның мемлекеттің мүддесі үшін активтерді тиімді басқаруды іске асыратын ұлттық әл-ауқат қоры ретіндегі стратегиясы мен рөліне сәйкес келетінін атап өтті.
ERG компаниясының сайтында да акцияның 40%-дық үлесіне «Самұрық-Қазына» иелік ететіні көрсетілген.
«ERG компаниясы акцияларының 40%-ына "Самұрық-Қазына" ұлттық әл-ауқат қоры" АҚ иелік етеді. Оның жалғыз акционері – Қазақстан Республикасының Үкіметі. ERG-дің негізін қалаушы акционерлерінің бірі – марқұм Алиджан Ибрагимовтің мұрагерлері компания акцияларының 20,7%-ына, ал Шахмұрат Мүтәліп компания акцияларының 39,3%-ына иелік етеді. ERG-дің бас кеңсесі Люксембургте», – делінген компанияның ресми сайтында.
Еске салсақ, таяуда Өнеркәсіп министрі ERG-дің екіге бөлінетіні жөніндегі сыбысқа қатысты пікір білдірген еді. Оның айтуынша, компания тарапынан активтерді бөлу немесе меншік иелерін ауыстыру жөнінде ресми өтініш түспеген.