Ерболат Досаев 14 млн теңге, ал жұбайы 2,3 млрд теңге декларациялады
Ақорда 2024 жылға арналған Президент әкімшілігінің бірқатар жоғары лауазымды қызметкерлері мен олардың отбасы мүшелерінің табысы туралы мәліметті жариялады.
Астана, NEGE. Президент әкімшілігі басшысының орынбасары, Алматының экс-әкімі Ерболат Досаев декларацияда 14 млн теңге табыс көрсеткен. Ал оның жұбайы Гүлнар Досаева 2,3 млрд теңге кіріс алғанын мәлімдеген. «Астана» халықаралық қаржы орталығының дерегінше, Гүлнар Досаева былтырдан бері «Жалтырбұлақ» алтын өндіру компаниясының тең құрылтайшысы болып табылады.
Қауіпсіздік кеңесінің хатшысы Ғизат Нұрдәулетов 2024 жылға қосымша табыс таппаған екен. Ал оның жұбайы 24,9 млн теңге декларациялаған.
Президент көмекшісі Қуанышбек Есекеев те қосымша табысын нөл деп көрсеткен. Оның жұбайының декларациясында 48 млн теңге кіріс тіркелген.
Президент кеңесшісі Алексей Цой да қосымша табыс көрсетпеген. Ал оның жұбайы 1 млн теңге табыс алғанын жариялады.
Президент әкімшілігінің мемлекеттік инспекторы Батыржан Байжұманов та қосымша кіріс таппағанын көрсетсе, жұбайы 2,6 млн теңге табыс декларациялаған.
