Ентігу мен жүрегіне ауа жетпейді: Амандық Баталов астанаға жеткізілді
Коронавирус жұқтырған Алматы облысының әкімі Амандық Баталов Нұр-Сұлтандағы кардиологиялық орталықта ем алып жатыр.
Aлматы, NEGE. Бұл туралы облыс әкімінің орынбасары Батыржан Байжұманов онлайн-брифингте айтты.
"Өздеріңіз білетіндей, Амандық Ғаббасұлыда коронавирус үш апта бұрын анықталды. Ол емделді, бірақ ентігу мен жүрекке ауа жетіспеушілігінің басталуына байланысты дәрігерлер оны Нұр-Сұлтан кардиологиялық орталығына жатқызу туралы шешім қабылдады", - деді Батыржан Байжұманов.
Сондай-ақ, ол қазіргі уақытта әкімнің жағдайы жақсарғанын атап өтті.
"Ол жерде ем алып жатыр, жағдайы әлдеқайда жақсарды. Ол үнемі спортпен айналысады, денсаулығы мықты. Сондықтан жақын арада ол жазылып, жұмысқа кіріседі", - деді Байжұманов.
Еске салайық, Алматы облысының әкімі Амандық Баталовтың коронавирус жұқтырғаны 22 маусымда хабарланған болатын.
