Энергетика министрі Болат АҚШОЛАҚОВ қызметінде қала ма?
Бүгін Орталық коммуникациялар қызметінде Энергетика министрі Болат Ақшолақов Қазақстандағы жанар-жағармай нарығына қатысты баспасөз конференциясына қатысып, журналистердің сұрақтарына жауап берді.
Үкіметте ауыс-түйіс басталды. Тағайындауларға қатысты Ақорданың баспасөз қызметі Президенттің Жарлықтарын шетінен жариялап жатыр. Бұрынғы лауазымын сақтап қалғандар да, «үн-түнсіз» кеткендер де бар.
Осы ауыс-түйістерге қатысты NEGE-нің тілшісі Энергетика министріне сауал қойды: Үкіметтегі ауыс-түйістерге байланысты қазіргі лауазымыңызда қалудан үміттісіз бе? Орнымда қалуым керек деп есептейсіз бе?
«Мен бұл сұраққа бірнеше рет жауап бердім. Қажетім бар болса, керек болсам қалдырады. Жоқ болса – жоқ. Бұл өзімнің ішкі шешімім емес. Ол үшін шешім қабылдайтын кісілер бар», – деп жауап берді Ақшолақов.
Сөз ауанына қарағанда, «министрдің міндетін атқарушы» Б.Ақшолақов қызметінде қалуға үмітті сияқты. Қала ма, қалмай ма, бұл жағы бүгін-ертең белгілі болмақ.
