Энергетика министрлігі КҚК терминалында екі танкерге шабуыл жасалғанын растады
Қазақстанның Энергетика министрлігі Каспий құбыр консорциумының теңіз терминалы ауданында мұнай тасымалдайтын екі танкерге жасалған шабуылға қатысты пікір білдірді.
Астана, NEGE. Министрлік ақпаратынша, 30 шілде күні Nissos Sifnos танкері үшінші айлақ арқылы тиеу жұмыстарын аяқтау кезінде тиеу манифольды ауданында ұшқышсыз ұшу аппараттарының шабуылына ұшырады. Дрон шабуылы қаупіне байланысты КҚК тарапынан мұнай тиеу жұмыстары алдын ала тоқтатылған.
Соққы салдарынан танкерде өрт шыққан. Шабуыл салдарынан туындаған өрт КҚК-ның үш буксирінің көмегімен сөндірілген.
Бұдан бөлек Marathi танкері де КҚК теңіз терминалынан 6–7 теңіз милі қашықтықта ұшқышсыз ұшу аппараттарының шабуылына ұшырады.
Қолда бар ақпаратқа сәйкес, экипаж мүшелері арасында зардап шеккендер жоқ, мұнайдың төгілуіне жол берілген жоқ.
Айта кетейік, Қазақстанның сыртқы істер министрі Ермек Көшербаев пен АҚШ-тың мемлекеттік хатшысы Марко Рубио телефон арқылы сөйлесіп, Каспий құбыр консорциумына қатысты жағдайды талқылады. Алайда ведомство келіссөздің қай бағытта өрбігенін ашық жариялаған жоқ.