Эндрюге қатысты дау-дамай күшейген тұста Гога Ашкенази туралы жаңа дерек жарияланды
Гога Ашкенази бұрынғы ханзада Эндрюге қатысты дау-дамай өршіп тұрған кезде Ұлыбританиядағы салық резиденті мәртебесін Біріккен Араб Әмірліктеріне ауыстырған.
Астана, NEGE. Бұл туралы «Выход к морю» Telegram арнасы оның MMG Global Consulting Limited компаниясының қаржылық есебіне сүйеніп хабарлады. Мәліметке қарағанда, лейбористер үкіметі салықтарды едәуір көтеретінін мәлімдеген соң, елден кеткен бай британдықтардың қатарына Ашкенази де кірген. Дегенмен, ол Ұлыбритания азаматтығын сақтап қалған.
Жақында құқық қорғау органдары бұрынғы ханзада Эндрюден қаржыгер Джеффри Эпштейнге құпия құжаттарды беру ісіне байланысты жауап алған.
Эпштейн ісіне қатысты жарияланған құжаттарда Гога Ашкеназидің есімі хат алмасулардың бірінде аталады.
«Миланда өткен өнер кеші өте жоғары деңгейде ұйымдастырылды. Кездейсоқ Fendi компаниясының бұрынғы директорын кездестірдім, ол қазір Гога Ашкеназимен бірге кешкі ас ішіп отыр екен», – делінген 2014 жылдың қазан айындағы хаттардың бірінде.
Құжаттарда ол туралы қысқаша мәлімет те берілген. Онда Ашкенази қазақстандық мұнай саласындағы ауқатты кәсіпкер, зайырлы ортада танымал тұлға, сондай-ақ ханзада Эндрюдің жақын танысы ретінде сипатталады. Оксфорд университетінде білім алған. 2001 жылы Эндрюмен танысып, содан бері араласып келеді. Бірнеше рет оның қонағы болғаны, соның ішінде Аскоттағы ат жарыстарына да қатысқаны айтылған.
