Енді жүргізуші куәліктерінде чип болмайды
Жүргізуші куәліктерінен чип алынып тасталады. Бұл туралы Ішкі істер министрлігі Әкімшілік полиция комитеті төрағасының орынбасары Әлібек Кеңесбаевтың мәлімдеді.
Алматы, NEGE. Дегенмен құжаттың бағасы өзгермейді, себебі мемлекеттік баж салығының мөлшері Салық кодексінде бекітілген.
«Жүргізуші куәлігін беру үшін мемлекеттік баж Салық кодексінде белгіленген. Ол бұрынғысынша қалады, өйткені төлем құжатты беру процесі үшін алынады», - деді Әлібек Кеңесбаев.
Оның айтуынша, чиптің қажеттілігі жойылған, себебі жол полициясы қызметкерлері барлық деректерді мемлекеттік базалардан онлайн режимінде ала алады. Сондықтан жүргізушілерге куәлікті өзімен бірге алып жүру міндетті болмайды.
Бұрын берілген жүргізуші куәліктері өз мерзімі аяқталғанға дейін жарамды болып қала береді. Ал чипсіз жаңа куәліктер 2026 жылдың бірінші жартысынан бастап беріледі. Құжаттың дизайны өзгеріссіз қалады. Сонымен қатар жүргізуші куәлігінде адам өлімінен кейінгі донорлық туралы ақпарат орналастырылмайды.
