Енді мұғалімге тіл тигізгендер 157 200 теңге айыппұл төлейді
Оқу-ағарту министрлігінің Заң басқармасының директоры Гүлден Ақытаева мұғалімдерге заңсыз талаптар қоюға болмайтынын атап өтті.
Алматы, NEGE. Оның айтуынша енді мұғалімдерді қызметтік міндетіне қатысы жоқ жұмыстарға тартуға, заңда қарастырылмаған есеп беру мен ақпарат сұратуға, негізсіз және заңсыз тексеріс жүргізуге, тауар немесе қызмет сатып алуға мәжбүрлеуге жол берілмейді.
«Педагог мәртебесі туралы» заң мұғалімдердің қадір-қасиетін құрметтеуге кепілдік береді және бұл нормаларды бұзғаны үшін жауапкершілік қарастырады. Мұғалімді қорлағаны, әдепсіз әрекет жасағаны, оның ішінде әлеуметтік желіде тіл тигізгені үшін 40 АЕК-ке дейін (157 200 теңге) айыппұл немесе 5 тәулікке дейін әкімшілік қамауға алу жазасы қарастырылған.
Сонымен қатар педагогке жала жапқан жағдайда жауапкершілік қылмыстық деңгейге дейін күшейтіледі.
