Енді фонограммамен ән айтқан әншілерге 400 мың теңгеден жоғары айыппұл салынады
Қазақстанда Әкімшілік құқықбұзушылық туралы кодекске енгізілген түзетулер күшіне енді.
Астана, NEGE. Президент Қасым-Жомарт Тоқаев түзетулерге осы жылдың 19 маусымында қол қойған еді.
Атап айтқанда, Әкімшілік құқықбұзушылық туралы кодекстің мәдениет туралы заңнама талаптарын бұзуға қатысты 156-бабы үшінші және төртінші бөліктермен толықтырылды.
«Телевизиялық жазбаларды және концерттік ойын-сауық мәдени-бұқаралық іс-шараларды өткізуге арнайы бейімделмеген және арналмаған өзге де орындарды қоспағанда, концерттік ойын-сауық мәдени-бұқаралық іс-шараларды өткізу кезінде ұйымдастырушылардың, шығармашылық ұжымдар мен орындаушылардың дауыс (вокалды) фонограммаларын пайдалануы – жеке тұлғаларға – 100 АЕК, заңды тұлғаларға 150 АЕК мөлшерінде айыппұл салуға алып келеді», – делінген заңнамада.
2026 жылы 1 АЕК 4325 теңге деп белгіленгенін ескерсек, жеке тұлғаларға 432 500 теңге, ал заңды тұлғаларға 648 750 теңге мөлшерінде айыппұл салынады.
Әкімшілік жаза қолданылғаннан кейін заңбұзушылық бір жыл ішінде қайталанатын болса, жеке тұлғаларға – 150 АЕК (648 750 теңге), ал заңды тұлғаларға 200 АЕК (865 мың теңге) мөлшерінде айыппұл салынбақ.