Енді Алматы көшелерінде троллейбустардың жүрмейтіні рас па?
БАҚ беттерінде және әлеуметтік желіде Алматы әкімдігі троллейбустардан бас тартып, олардың орнына электробустар енгізуді жоспарлап отыр деген ақпарат тараған болатын.
Алматы, NEGE. Жазылған мәліметтерге сәйкес, троллейбустардан бас тарту шешімі қаланың сыртқы келбетін жақсарту мақтсатында қабылданған. Троллейбустардың сымдары қала көрінісін бұзады-мыс.
Алайда Алматы әкімдігі аталмыш ақпаратты жоққа шығарды.
«Қазіргі уақытта троллейбустардан бас тарту, контакт желілерін алып тастау немесе көлік паркін толық жаңарту жоспарланып отырған жоқ. Қалалық қызметтер қоғамдық көлікті дамыту бағдарламалары аясында жұмысты жалғастырып, тұрғындарды сапалы әрі қолжетімді тасымалмен қамтамасыз етуге күш салып жатыр», – деді Алматы әкімдігінің баспасөз қызметі NEGE тілшісіне берген жауабында.
