Дүние
Ең кішкентай адам өмірден озды
Әлемдегі ең қортық адам – Хегандра Тапа Магар 28 жасында қайтыс болды. Бұл жөнінде «Гиннестің рекордтар кітабы» өзінің сайтында хабарлап отыр.
Алматы, NEGE. Хегандра Тапа 1992 жылы Непалда дүниеге келген. Ол 2011 жылы 67,08 см бойымен «өз аяғымен жүре алатын әлемдегі ең бәкене бойлы адам» ретінде рекордтар кітабына енген. Өйткені, Хегандрадан 7 см бәкене бойлы филипиндік қортық Джунрей Балауинга денсаулығына байланысты өзі жүріп-тұра алмайды екен.
«Хегандра 2011 жылдан бастап Непалда туризм саласының «Мейірімділік елшісі» боп тағайындалған. Ол кейінгі кезде жүрек дертімен, астма және пневмония секілді сырқаттармен көп алысып кетті. Жуырда ғана Непалдағы Manipal ауруханасына орналастырылған еді», – деп жазады рекордтар сайты.
Енді, әлемде өздігінен жүріп-тұра алатын ең қортық адам колумбиялық Эдуардо Ниньо Эрнандес аталып отыр. Оның бойы 70,21 см.