Астанада автокөлік салонынан ұрлық жасаған күдікті ұсталды

Алматы, NEGE. Астана қаласында автокөлік салонынан мүлік ұрлаған күдікті жедел іздестіру шаралары нәтижесінде қолға түсті. Бұл туралы қалалық полиция департаменті хабарлады.

30 жастағы қала тұрғыны таңертең көлігіне оралғанда салонына біреудің заңсыз кіргенін байқап, дереу полицияға жүгінген. Қылмыс түнгі уақытта жасалып, оқиға орнында куәгерлер болмаған. Соған қарамастан, Алматы ауданының криминалдық полиция қызметкерлері жедел іс-қимыл танытып, күдіктіні қысқа мерзімде анықтады. Ол – 22 жастағы қала тұрғыны болып шықты.

Тергеу барысында анықталғандай, Mercedes автокөлігі көпқабатты үйдің ауласында тұрған. Күдікті түнде бірнеше көліктің есігін тексеріп, құлыпталмаған көлікті тауып, ішіне кіріп, салонынан кілт жасауға арналған арнайы құрылғыны жасырын алып кеткен. Келтірілген материалдық шығын көлемі шамамен – 300 мың теңге.

Қазіргі таңда аталған факті бойынша ҚР ҚК сәйкес қылмыстық іс қозғалды. Айғақты зат тәркіленіп, іске тіркелді. Күдікті өз кінәсін толық мойындады.