Елорда күні онлайн режимде өтеді
Астана күнінің барлық іс-шаралары онлайн режимде өтеді. Бұл жайында бүгін қалалық әкімдіктің ресми сайты хабарлады.
Алматы, NEGE. «Эпидемиологиялық ахуалға байланысты бұған дейін Астана күніне жоспарланған барлық іс-шаралар тоқтатылды. Шаралар тек онлайн режимде өтеді» делінген хабарламада.
Қалалық мәдениет басқармасының хабарлауынша, «Домбыра күні» шарасын тұрғындар Қазақстан телеарнасынан онлайн режимде тамашалай алады.
«Іс-шаралардың көпшілігі әлеуметтік сипатта болады – ерекше қажеттіліктері бар балаларға арналған реабилитациялық орталық, жұмыссыз әйелдерге ШОБ негіздерін үйрететін «Кәсіпкер ана» әлеуметтік орталығы, Жағалау ауданында жедел жәрдем стансасы мен «Доктор у дома» медицина орталығы және басқа да әлеуметтік нысандардың ашылуы болады. Шараларға қатысатын адамдар саны шектелген», – деп хабарлады әкімдік сайты.
Сонымен қатар үй кезегіндегілер мен үлескерлерге пәтер кілттері тапсырылады – қатысушылар саны шектеулі және санитарлық нормалар қатаң сақталады: маска тағып, әлеуметтік қашықтық сақтау керек.
