Елімізде зейнетақы мөлшері артты

Алматы, NEGE. Базалық зейнетақы 6,5%-ға, ал ынтымақты зейнетақы 8,5%-ға индекстелді.

Бұл өзгерістер 2025–2027 жылдарға арналған республикалық бюджет туралы заңға сәйкес жүзеге асырылып отыр. Ұлттық Банктің инфляцияға қатысты болжамдары ескеріле отырып, ынтымақты зейнетақының мөлшері инфляция деңгейінен 2%-ға артық көрсеткішпен өсірілді.

Негізгі өзгерістер:

• Базалық зейнетақының ең төменгі мөлшері 65%-дан 70%-ға дейін ұлғайтылып, 32 360 теңгеге жетті.
• Ең жоғары мөлшері 105%-дан 110%-ға дейін өсіп, 50 851 теңгені құрады.
• Ынтымақты зейнетақы 8,5%-ға артты

Мысалы, 2019 жылы зейнетке шыққан 69 жастағы зейнеткердің 2024 жылы алған жалпы зейнетақысы 156 856 теңге болса, 2025 жылдан бастап бұл сома 171 588 теңгеге дейін өседі. Оның ішінде:

• Базалық зейнетақы – 50 851 теңге
• Ынтымақты зейнетақы – 120 737 теңге.

Бұл сомаларға Бірыңғай жинақтаушы зейнетақы қорынан төленетін қосымша төлемдер кірмейді.

2025 жылы зейнетке шығу жасы өзгеріссіз қалады:

• Ерлер үшін – 63 жас,
• Әйелдер үшін – 61 жас.