Елена Рыбакина Майами мастерс турнирінің финалында жеңіліп қалды
Қазақстанның бірінші, әлемнің 7-ракеткасы Елена Рыбакина Майами WTA 1000 турнирінің финалында қарсыласына есе жіберді.
Алматы, NEGE. Қазақстандық теннисші финалда әлемнің 12-ракеткасы, чехиялық Петра Квитовамен шеберлік байқасты. Қарсыластар осыған дейін екі мәрте кездесіп, бір-бірден жеңіске жеткен еді.
Бұл жолы бірінші партияда есеп 4:4 болған мезетте чехиялық теннисші брейк жасап кеткенімен, Елена сол бойда таразы басын теңестірді – 5:5. Аса тартысты өткен тай-брейкте ол бес сет-пойнтты пайдалана алмады – 6:7 (14:16). Бір сағат 6 минутқа созылған бірінші сеттің өзінде Е.Рыбакина 10 эйс жасап үлгерді.
Екінші сетте П.Квитова брейкпен алға кетті – 2:0. Ақыры ол матчты тағы бір брейкпен түйіндеді – 6:2.
Осылайша, Елена Рыбакина Майами мастерс жарысының финалында жеңіліс тапты.
Бір сағат 42 минутқа созылған бәсеке барысында қазақстандық теннисші 12 эйс жасап, 2 брейк-пойнттың біреуін өз есебіне жазды. Қарсыласы 5 эйс, 3 брейкпен (8 брейк-пойнт) көзге түсті.
Еске сала кетейік, бұдан бұрын Елена Рыбакинаның Майами финалындағы қарсыласы анықталғанын жазған болатынбыз.
Сондай-ақ Елена Рыбакина бір жылда үш бірдей ірі жарыстың финалына шыққан алтыншы теннисші атанды.
Теннисші Жібек Құламбаева Түркиядағы жарыстың жеңімпазы атанды.
