Елена Рыбакина Индиан-Уэллс турнирінің төртінші айналымына шықты

Алматы, NEGE. Қазақстандық теннисші үшінші айналымда әлемнің 38-ракеткасы, ұлыбританиялық Кэти Бултермен бетпе-бет келді.

Қарсыластар осыған дейін 2023 жылы Уимблдон жарысында кездесіп, онда Рыбакина 6:1, 6:1 есебімен ойсырата ұтқан еді.

Бұл жолы бірінші партияда қазақстандық спортшы бірде-бір гейм берген жоқ – 6:0.
Екінші сетте есеп 3:3 болған мезетте Еленаның қателігін пайдаланған Бултер брейк жасап, сосын өз геймін алып, алға кетті – 5:3. Дегенмен Рыбакина таразы басын теңестірді – 5:5.

Содан кейін матчты тағы бір брейкпен түйіндеді – 7:5.

Бір сағат 16 минутқа созылған бәсеке барысында Рыбакина 6 эйспен бірге 9 брейк-пойнттың бесеуін мүлт жіберген жоқ. Бултер 2 эйс, 1 брейкпен шектелді.

Елена Рыбакина ширек финалға шығу үшін әлемнің 11-ракеткасы, ресейлік Мирра Андреевамен таласады. Ол рейтингіде 21-орындағы даниялық Клара Таусонды жолдан тайдырды - 6:3, 6:0.

Елена Рыбакина Индиан-Уэллсте 2023 жылы чемпион атанса, өткен жылы денсаулығына байланысты додадан тыс қалған еді.

Биыл мұндағы жүлде қоры 9 млн АҚШ долларына жуықтайды. Турнир жеңімпазы 1,1 млн астам табыс тауып, 1 мың рейтингілік ұпайға ие болады.