Электромобильдерді кез келген жерде қуаттауға тыйым салынады

Астана, NEGE. Бұл жөнінде «Қазақстан Республикасының кейбір заңнамалық актілеріне экологиялық таза көлікті танымал ету және электромобильдерге арналған инфрақұрылымды дамыту мәселелері бойынша өзгерістер мен толықтырулар енгізу туралы» Қазақстан Республикасы Заңының жобасы жөнінде баяндаған Мәжілістің Экология мәселелері және табиғат пайдалану комитетінің мүшесі Арман Қалықов жария етті.

Сонымен қатар екінші оқылымда депутаттар электр желілеріне өз бетінше қосылғандар үшін жауапкершілік қарастыру туралы түзетулер енгізді. Бұл стандарт азаматтардың өмірі мен денсаулығына қауіп төндіретін көппәтерлі тұрғын үйлердің тұрақтарында электрқуаттау станцияларын электр желілеріне заңсыз қосу қаупін жою үшін әзірленген.

Бұдан бөлек экологиялық таза көліктерге деген қызығушылық пен сұранысты арттыра түсу үшін заңда оларға деген артықшылықтар да қарастырылған.

Мәселен, заңда электрқуаттау станцияларымен жабдықталған орындарға өзге көлік құралдарын тоқтату немесе қою ережелерін бұзғаны үшін әкімшілік жауапкершілік енгізіледі. Яғни, электр қозғалтқыштарымен жабдықталмаған көліктердің жүргізушілеріне көлігін тұраққа қоюға тыйым салынады.

Бұдан бөлек электромобильдердің иелері көлік тұрағына ақы төлеуден босатылады.

                                                                                                                          Сағадат БАҚЫТБЕК