Елдана Тәліпова Азия чемпионатында алтын медаль иеленді
Бокстан Қазақстан әйелдер құрамасының спортшылары Таиландтың Чиангмай қаласында өткен Азия чемпионатында бес алтын медаль жеңіп алды, деп хабарлайды Olympic.kz.
Алматы, NEGE. Соңғы болып шаршы алаңға 81 келіден жоғары салмақта Елдана Тәліпова шықты.
Ақтық сында Елдана Өзбекстаннан барған Олтиной Сотимбоеваға қарсы қолғап түйістірді. Нәтижесінде отандасымыз үш раундтың бәрінде жеңіске жетті.
Біздің спортшылар финалға шыққан барлық бес кездесуді жеңіспен аяқтады.
Азия чемпионатын алтын медальмен аяқтағандар: Виктория Графеева (60 келіге дейін), Аида Әбікеева (63 келіге дейін), Наталья Богданова (70 келіге дейін), Гүлсая Ержан (81 келіге дейін).
Сонымен қатар құрлық біріншілігінде Әйгерім Сәттібаева (48 келіге дейін), Жазира Орақбаева (52 келіге дейін), Ұлжан Сәрсенбек (57 келіге дейін), Милана Сафронова (66 келіге дейін) және Диана Мағауияева (75 келіге дейін) қола медаль иеленді.
