Жаңадан салынып жатқан Талдықорған-Үшарал жолын су шайып кетті
Қатты жауған нөсер жаңадан салынып жатқан жолды шайып кетті.
Алматы, NEGE. Қатты жауған жаңбырдан кейін ағынды су жаңадан салынып жатқан Талдықорған-Үшарал жолын шайып кетті.
Әлеуметтік желіде жолдың қақ ортасынан бөлініп, екі жағында автокөліктер тұрған видеолар тарап жатыр. «Жігіттер, Сарқанға барар жол екіге бөлініп қалды, мынау деген масқара?! Жаңадан салынған жол», - дейді бейнежазба авторы.
Оқиға Сарқан ауданына жетпей, Ақсу ауданындағы Жансүгіров ауылынан кейінгі Еңбек ауылының маңында болған. Ақсу ауданы әкімінің баспасөз қызметі ақпаратты растады.
«22 мамыр күні сағат 16:45-те хабарлама түсті. Алматы-Өскемен республикалық маңызы бар жолдың 395-шақырымындағы Еңбек ауылының тұсында қалың жауын-шашын суы көпірді шайып кеткен. Құбыр тәрізді көпірдің диаметрі - 3,5 м, тереңдігі - 3 метр. Матай-Лепсі ауылдары арқылы айналма жол бар», - делінген Ақсу ауданы әкімі баспасөз қызметінің хабарламасында.
