Вакцина салдырғандар Ashyq-та қашан және қалай белгіленеді?
Ashyq жүйесі вакцинация төлқұжаттарын шілдеге дейін енгізуге уәде берді. Енді қазақстандықтар коронавирусқа қарсы вакцинаның екінші дозасын салдырғаннан кейін бір жыл бойы "жасыл" мәртебеге ие болады деп жоспарланып отыр.
Алматы, NEGE. "Вакцинация төлқұжаты интеграцияланады, қазіргі уақытта Цифрлық даму, инновациялар және аэроғарыш өнеркәсібі министрлігімен техникалық жұмыстар жүріп жатыр. Екі компонентті де салдырғандардың мәртебесі "жасыл" болады", - деп хабарлады Денсаулық сақтау министрлігінің көліктегі санитарлық-эпидемиологиялық бақылау департаментінің басшысы Жанар Оразалина ОКҚ брифингінде.
Оның айтуынша, интеграция 1 шілдеге дейін аяқталуы тиіс.
"Вакцинация төлқұжатына келер болсақ, 1 шілдеге дейінгі уақыт белгіленді, бірақ вакцина алған адам "жасыл" мәртебеге ие болуы үшін барлық мәселені ертерек жабуға тырысамыз", - деді цифрлық даму, инновациялар және аэроғарыш өнеркәсібі вице-министрі Әсет Тұрысов.
"Атамекен" ҰКП төрағасының орынбасары Юлия Якупбаева неге база әлі күнге дейін интеграцияланбағанын түсіндірді. Айтуынша, талқылануы қажет мәселелер бар, оның інішде ғалымдармен де. Мысалы, вакцина салдырғандарда "жасыл" мәртебе қанша уақытқа созылады?
Оразалинаның айтуынша, вакциналанғандарға "жасыл" мәртебе бір жылға беріледі. Содан кейін не істеу керегі шешіліп жатыр.
