Талдықорған ауруханаларына 38 оттегі концентраты тарту етілді
Талдықорғанға көпшіліктің ақшасына алынған 38 оттегі концентраты әкелінді. Қоймаға жиналған медициналық құрылғылар бүгін кәсіпкерлердің көмегімен емдеу мекемелеріне үлестірілді.
Алматы, NEGE. Құрылғылар Қаратал, Көксу, Ескелді аудандары мен қаладағы он ауруханаға жеткізілді. Оттегі аппараты «Шұғыла» қорына жолданған сұранысқа сай беріліп отыр. Бизнес қауымдастығы өкілдерінің үндеуінен кейін ел-жұрттан 10 млн теңгеге жуық қаражат жиналған-ды. Оған 79 құрылғы алу жоспарланып, бүгінгі күнге дейін соның 43 провизорлық және инфекциялық бөлімдерге берілді. Қалғаны алдағы уақытта ауруханаларға таратылады.
Қалалық көп салалы аурухананың директоры Жұмахан Молдақұлов: "Беріліп жатқан мұндай аппараттар негізінде күнде бір адамды орнына келтіріп, өмірін сақтап қалуға болады. Неге десеңіз, күнделікті егер уақытылы оттегі алған науқас тезірек орнына келеді. Тезірек жазылады. Сондықтан бұл аппарат жүріп жатқан аурудың негізгі емі болып саналады" дейді.
Ал кәсіпкер Дәурен Тәліпов: «Шұғыла» фонды әр концентраторға өз штирх-кодын салды. Және өздерінің базасына кіргізді. Ол жаңағы әр концентратордың қай ауруханада тұрғанын бақылап отырады. Сондықтан концентраторлар былай кетіп қалмайды, жеке адамның қолына түсіп кетпейді.Тек қана ауруханада еліміз үшін, халқымыз үшін пайдалануда қалады" деді.
