Бәрінен кешірім сұраймын: «Бауыржан шоудағы» Нұрбек Мәдиев қайда жүр?

18 наурыз, 10:50
Бәрінен кешірім сұраймын: «Бауыржан шоудағы» Нұрбек Мәдиев қайда жүр?
Фото: ғаламтордан

Актер, "Бауыржан шоу" театрының бұрынғы әртісі Нұрбек Мәдиев өмірі мен өткені жайлы "Ең алғашқы" бағдарламасында айтты.

Алматы, NEGE. Актер "Бауыржан шоудан" неге кетті? Бірінші, екінші некесінің бұзылуына не себеп болды? 27 жыл көрмегін ұлы мен әйелін көруге дайын ба? Актер өнер жолына келген уақыттан бастап, бүгінгі күнге дейінгі қызықтары мен қиындықтарды баяндады.

Нұрбек Мәдиев "Бауыржан шоу" театрының жұлдызы. Осы театр арқылы көпшілікке танылып үлгерген. Студент шағында үйленіп, әке атанған. Алайда отбасылық қиындықтарға байланысты театрдан кеткен. Бұның сырын өзі айтып берді. Сол кездегі әріптесі Алмат Сақатов Нұрбек Мәдиевтің талантты азамат екенін айтып, оның театрдан ерте кеткеніне өкінді. 

"Нұрбек талантты жігіт қой. Ол нағыз комедия актері. Оның жүрген жері комедия. Ол драмадан гөрі комедияға көп келеді. Сахнада да, сахнадас тыс уақытта да қызықтары көп. "Бауыржан шоудан" кеткеніне өзімізді кінәлайымн. Сол кездегі жанында жүрген біздер, Бауыржан Ибрагимов бастап оны алып қалуға болар еді. Бірақ олай істемедік. Соған өкінемін", - деді Сақатов. 

Ал актердің өзі бұған ешкімді кінәламайды. Бәріне отбасылық жағдай себеп болғанын айтады. 

"Мен театрда жүргенде ата-анамның қасына баруым керек болды. Ағам хабарасып, әке-шешемнің жағдайын айтты. Ауырып қалғанын айтты. Сондықтан өнерді қайда болса да алып жүруге болады. Қайта келуге болады. Дер кезінде әке-шешемнің қасында болайын деп кеттім. Ол үшін ешкімді кінәламаймын", - деді ол. 

Нұрбек Мәдиев 2005 жылы ауыр жол апатына түсіп, күйзелістен шыға алмағанын мойындады. Адам өліміне өзін кінәлі сезініп, біршама жыл ішкілікке салынғанын да айтты. 

"2005 жылы қайын атамның мерейтойына бардық. Әйелім, енем мен қайын ағам өтініп қоймаған соң бару керек болды. Оларды көлікпен апару керек болды. Өзім сол тойға барғым келмеген еді. Бәрі өтінген соң баруға тура келді. Қайтар жолда жол апатына ұшырадық. Қатты жылдамдықпен келе жатып, апатқа түстік. Сол жерде қайын ағам қайтыс болды. Әйелім, балам, бәрі көлікте еді. Содан бастап 4 жыл өзіме келе алмай жүрдім. Өзімді кінәлі сезіндім. Мені кінәлағандар болды. Әйелімнің өзі кінәлағандай болды. Бәрі жаныма батты. 2009 жылдары өзіме келе бастадым", - деді Мәдиев. 

Бұл жылдар артта қалды. Бүгінде ақыл тоқтатқан жаста. Әкесінен айырылып, әке орнына әке рөлін атқарып жүр. Бірінші, екінші некесі сәтсіз болды. 20 жыл некелескен әйелімен ажырасып кеткен. Екінші некесінен туған ұлы ата-анасының қосылғанын қалайды. 

"Бірінші Лиза екеуміз үйлендік. Жас кезімізде үйлендік. Тұңғышымды әке-шешем бақты. 4 жасына дейін өздері қарады. Бірақ құдалар бір-бірін түсіне алмады. Сөзге келіспей қалды. Сондықтан ажырасу туралы мен айттым. Егер ата-аналарымыз бір-бірін түсінбесе, ажырасып тынайық дедім. Солай екі жаққа кеттік. Әйелім ұлымды алып кетті. Содан көрсетпеді. Әке-шешем де немересін күтті. Іздеді. Әкем жақында қайтыс болды. Немересін бір көрсем деген арманы орындалмай кетті", - деді актер.

Нұрбек Мәдиев екінші әйелімен 20 жыл бірге тұрып, үш баланы тәрбиеледі. Алайда бұл неке де сәтсіз аяқталды. 

"Екінші әйелім Ардақ өзі кетті. Тұрғысы келмеді. Тұрғысы келмеген адамды ұстай алмадым. 20 жыл тұрып, 3 баламен ажырасып кеттік. 5-6 жылдай уақыт өтті. Қазір Светлана есімді орыс әйелмен бірге тұрамын. Мен барлық әйелімді жақсы көремін. Лизаны да, Ардақты да, Светаны да жақсы көрем. Барлық әйелімнен кешірім сұраймын. Балаларымды жақсы көремін. Бәрі жанымда болса деймін. Балаларымның араласқанын қалаймын. Әкемнің арманы орындалмады. Енді анам тірі күнінде немерелерін көрсе деймін", - деді актер.