Алматыда вакцина алғандар саны 1 миллионға жуықтады

13 қазан, 11:19
Алматыда вакцина алғандар саны 1 миллионға жуықтады
Фото: Ғаламтордан

Алматы қаласында бір тәулікте 4 436 адам коронавирусқа қарсы вакцина салдырды, деп хабарлайды қалалық Қоғамдық денсаулық сақтау басқармасы.

Алматы, NEGE.  «12 қазан күні 4 436 алматылық вакцина салдырды. Коронавирусқа қарсы екпенің І компонентін – 1764, II компонентін 2 672 адам алды. Вакцина салдырғандар саны бойынша Алматы қаласы алдыңғы орында. Биылғы жылдың 1 ақпаны мен 11 қазаны аралығында қалада 971 283 тұрғын вакцинаның бірінші компонентін, 902 062 адам екінші компонентін салдырған. Олардың ішінде 119 523 адамның жасы 60-тан асқан»,- деп хабарлады басқармадан.

Қалада 160 пункт жұмыс істеп тұр. 1 028 адамнан тұратын 237 егу бригадасы бар.

«Қазір медицина ұйымдарында, мектептерде, мәдениет, спорт объектілерінде, базарлар мен қаланың сауда, ойын-сауық орталықтарында вакцинация пунктері жұмыс істейді», - деп нақтылады Қоғамдық денсаулық сақтау басқармасының баспасөз қызметінен.