Алматыда тісін жұлдыруға барған 22 жастағы қыз қайтыс болды
Алматыда 22 жастағы қыз ақыл тісін жұлдырып, басқа тістерін емдету үшін стоматологияға барған: ол тұрмысқа шығуға дайындалып жүрген, деп хабарлады zhaloby.almaty паблигі.
Алматы, NEGE. Олардың ақпараты бойынша дәрігерлер қызға төрт ақыл тісін жұлдырып, басқа бірнеше тісін емдеуді ұсыныпты. Қызмет құны 420 мың теңге болатынын айтқан. Қыз кепілақы төлеген, ал анестезиолог оған отаның толық наркозбен жасалатынын ескерткен.
Ота алдында қызы анасына қоңырау шалып, тіс дәрігеріне келгенін хабарлаған. Ал ол қызын жақсы көретінін және үйде күтетінін айтқан. Алайда, алматылық қыз үйге қайтып оралған жоқ: 6 сағаттан кейін анасына ұлы қоңырау шалып, әпкесінің қайтыс болғанын жеткізді.
Марқұмның анасы клиникаға келгенде оған қызының денесін көруге рұқсат бермеді.
Пабликтің мәліметінше, дәрігерлер қыздың анафилаксиялық шоктан қайтыс болғанын хабарлаған. Оқиға орнына полиция инспекторы келді, дәрігерлер оған екі сағат бойы қызды қайта тірілтуге тырысқанын айтқан көрінеді. Олар клиникада жеке реанимация бөлімі болғандықтан жедел жәрдем шақырмаған.
«Аталған факті бойынша тергеу басталды. Тергеу барысы департаменттің бақылауында болады», – деп жазды Алматы қаласы полиция департаменті бастығының тергеу жұмысы жөніндегі орынбасары Рүстем Әбдірахманов әлеуметтік желідегі парақшасында.
