27 Мамыр 14:39

Алматы облысында тағы 2 қант зауыты қалпына келтіріледі

Фото:

Алматы облысының Алакөл және Қарабұлақ қант зауыттарын қайта қалпына келтіру жоспарлануда.

Алматы, NEGE. Өңірдегі қызылша алқабының аумағын 35 мың гектарға ұлғайту арқылы қант қызылшасы көлемін екі миллион тоннаға дейін жеткізу межесі белгіленген. Бұл туралы бүгін Орталық коммуникациялар қызметінде брифинг өткізген Алматы облысының әкімі Амандық Баталов мәлімдеді.

Облыс басшысы баяндамасында Агроөнеркәсіптік кешенде 2022-2026 жылдарға арналған Ұлттық жоба шеңберінде ет, жеміс-жидек, көкөніс, қант, сүт өнімдері, дәнді және майлы дақылдарды өндіру мен өңдеу бойынша жеті ірі экожүйе қалыптастыру жоспарланғанын атап өтті. Өңірде 1,3 млн бас ірі қара, 4,5 млн бас қой-ешкі, 1 млн гектарға жуық егіс алқабы бар екенін ескерсек, облыс осы жобаның ең белсенді қатысушыларының бірі болып табылады.

«Мысалы, қант өндіретін екі зауыт жұмыс істеп тұр, енді Алакөл және Қарабұлақ қант зауыттарын қалпына келтіру жоспарлануда. Осылайша біз алқап аумағын 35 мың гектарға ұлғайту арқылы қант қызылшасы көлемін екі миллион тоннаға дейін жеткізу міндетін қойып отырмыз», - деп атап өтті А.Баталов.

Өңір басшысы ет өңдейтін «Жетісу Қой» жобасының жүзеге асырыла бастағанына да тоқталды. Бүгінгі күні барлық ұйымдастыру мәселелері шешілгенін, инженерлік инфрақұрылым құрылысына қаржы бөлінгенін, инвестордың зауытты жобалауды бастағанын айтты. Ет өңдейтін «Жетісу Қой» жобасы туралы да еске салып, оған қатысты барлық мәселелер шешілгенін, инженерлік инфрақұрылым құрылысына қаржы бөлінгенін жеткізді.

Тегтер: