11 мыңнан астам этникалық қазақ қандас мәртебесін алды
1 қарашадағы жағдай бойынша 11,8 мың адам тарихи Отанына оралып, қандас мәртебесін алды.
Алматы, NEGE. 1991 жылдан бері республикаға 1 миллион 69,1 мың этникалық қазақ оралды, деп хабарлады ҚР Еңбек және халықты әлеуметтік қорғау министрлігінің баспасөз қызметі. Осы жылы Қазақстанға келген қандастардың жартысынан көбі (55,5%) Қытайдан, 28,8%-і Өзбекстаннан, 9,1%-і Түрікменстаннан, 3,4%-і Моңғолиядан және 2,9%-і басқа елдерден келген. Келген этникалық қазақтар негізінен Алматы (52,3%), Маңғыстау (13,4%) және Түркістан (5,5%) облыстарына, сондай-ақ Нұр-Сұлтан (4,1%) және Алматы қалаларына (5,7%) қоныстанды. 10 айдың қорытындысы бойынша еңбекке қабілетті жастағы қоныс аударушылар саны 55,9%, еңбекке қабілетті жастан кіші 32,6% және зейнеткерлер 10,5% құрайды.
