Дүние
Экс-президент екінші мәрте сотталды
Оңтүстік Кореяның бұрынғы президенті Ли Мён Бак 17 жылға бас бостандығынан айырылды. Оған аса ірі көлемдегі пара алды деген айып тағылып отыр.
Алматы, NEGE. Рёнхап агенттігінің хабарлауынша, 78 жасар экс-президент сот залынан бірден түрмеге әкетілген. Бұған қоса оған мемлекет қоржынына 15,7 млн АҚШ долларын құю міндеттелді.
Ли Мён Бак Оңтүстік Кореяны 2008-2013 жылдар аралығында басқарды. Кейін үстінен жемқорлық бабы бойынша қылмыстық іс көтеріліп, 15 жылға кесілген. Денсаулығына байланысты үйқамаққа шығарылған экс-президентке жаңа айыптар қосылып, 17 жылға сотталды.
Естеріңізге сала кетейік, Ли Мён Бактан кейін мемлекет тізгінін қолына алған (2013-2017) Пак Кын Хе де сыбайлас жемқорлыққа қатысы бар, билікті теріс мақсатта пайдаланды және коммерциялық компанияға заңсыз көмектесті деген айыппен 24 жылға сотталған болатын.