Экс-президенттің атындағы қорды қызы басқаратын болды
Түркіменстанның бұрынғы президенті Гурбангулы Бердімұхамедовтың қызы әкесінің атындағы қордың вице-президенті болып тағайындалды.
Огулджахан Атабаева – Түркіменстанның бұрынғы президенті Гурбангулы Бердімұхамедовтің үлкен қызы.
Turkmen.news. басылымының хабарлауынша, О.Атабаева әкесінің атындағы қорда көмекке мұқтаж балаларды емдеумен айналысады. О.Атабаеваны вице-президент етіп тағайындау туралы шешімді Г.Бердымухамедов 7 желтоқсанда қор басқармасының Арқадақта өткен отырысында қабылдаған.
Экс-президенттің үлкен қызы Огулджахан мен күйеубаласы Дәулет Атабаев бұған дейін Ұлыбританияда тұрған. Д.Атабаев Түркіменстанның Лондондағы елшілігінде кеңесші лауазымын атқарған. 2019 жылы оған қатысты қызық жағдай болғаны белгілі: жергілікті велосипедшілердің бірі Д.Атабаевтың рөлде телефонмен сөйлесіп келе жатқанын байқап, ескерту жасаған. Сол кезде көлікте оның әйелі де отырған.
Жергілікті БАҚ-тың жазуынша, Атабаев Құрылыс жөніндегі мемлекеттік комиссия төрағасының кеңесшісі деген шартты лауазымға ие. Шын мәнінде ол Арқадақтағы медициналық нысандарға бақылау жүргізеді. Арқадақ – Бердімұхамедовтердің отбасылық жобасы. Ал О.Атабаеваның бұл тағайындалуы отбасылық кланның ықпалын көрсетсе керек.
Отбасы мүшелерін саясатқа араластыру – Орталық Азия басшыларына тән жағымсыз әдеттердің бірі. Қазақстанның экс-президенті Нұрсұлтан Назарбаевтың отбасы мүшелері де осындай артықшылықтардан құралақан емес. Назарбаевтың өзі биліктен кетсе де, отбасы мүшелері әлі де ықпалды. Ал Назарбаевтың атындағы түрлі қорлар миллиардтарды емін-еркін айналдырып жатыр.
