Экс-министр Асхат Оралов «Әділет» партиясында жаңа қызметке ие болды
Бұрынғы мәдениет және спорт министрі Асхат Оралов «Әділет» партиясы төрағасының орынбасары атанды. Сондай-ақ партия басшысының орынбасары қызметіне Нұрсұлтан Байтілесов пен Эльдар Жұмағазиев тағайындалды.
Астана, NEGE. Партия таратқан ақпаратқа қарағанда, Асхат Оралов бақылау, талдау және қызметті бағалау мәселелеріне жетекшілік етеді. Ол әр жылдары Павлодар облысы әкімінің орынбасары, ақпарат және қоғамдық даму вице-министрі, Астана қаласы әкімінің орынбасары, мәдениет және спорт министрі, Президент Әкімшілігінде мемлекеттік инспектор қызметтерін атқарды. Тағайындауға дейін Маңғыстау облысы әкімінің бірінші орынбасары лауазымында жұмыс істеді.
Нұрсұлтан Байтілесов құқықтық және заңнамалық бағытқа жетекшілік етеді. Ол аудандық сот маманынан бастап, Қазақстан Республикасы Сот әкімшілігі басшысының бірінші орынбасарына дейінгі қызмет жолынан өтті. Сондай-ақ Парламент Мәжілісінің VIII шақырылымының депутаты болған.
Эльдар Жұмағазиев экономика, салалық және өңірлік даму мәселелеріне жауап береді. Ол Атырау мұнай және газ институтын, сондай-ақ Ресей Федерациясы Президентінің жанындағы Ресей мемлекеттік қызмет академиясын тәмамдады. Әр жылдары Атырау облысындағы ішкі саясат саласында қызмет етіп, «Атырау-Ақпарат» КМК өңірлік медиахолдингін басқарған, «Атамекен» Ұлттық кәсіпкерлер палатасында басшылық қызметтерде жұмыс істеді. Партиялық жұмыста тәжірибесі мол.
Бұған дейін партия төрағасының орынбасарлары лауазымдарына коммуникация мәселелері жөнінде – Әлия Адамбаева, идеология бағыты бойынша – Ержан Жылқыбаев және цифрландыру мәселелері жөнінде – Қаныш Төлеушин тағайындалған еді.