«Екінші үйім»: ДДСҰ басшысы Қазақстанға қонаққа келіп, қазақша ән шырқады
Дүниежүзілік денсаулық сақтау ұйымының бас директоры Тедрос Аданом Гебреисус желідегі парақшасында Қазақстанға құда-жекжатына қонаққа келіп, көңілді кештің куәсі болғанын жазды.
Астана, NEGE. ДДСҰ басшысының Instagram-дағы жеке парақшасында жариялаған видеосынан оның Мәжіліс депутаты Дәулет Тұрлыхановпен бірге Ескендір Хасанғалиевтің әйгілі «Атамекен» әнін айтып тұрғанын аңғарамыз. Сондай-ақ ол Қазақстанды «екінші» үйім деп атап, құда-құдағиына керемет кеш үшін алғысын білдірген.
«Ардақ құдағи мен Дәулет құдаға тамаша кеш үшін рахмет. Қазақстандағы құда-жекжатпен керемет уақыт өткіздік. Күлкі, махаббат және бір шаңырақ астында әдемі әндер шырқалды.
...Екінші үйімде болғаныма өте қуаныштымын. Жүрек ән салатын жер – отбасы, ал бүгін кеште менің жүрегім шаттыққа толы болды», – деп жазды Дүниежүзілік денсаулық сақтау ұйымының басшысы.
Айта кетейік, Дәулет Тұрлыхановтың Айдана есімді қызы Тедрос Аданом Гебрейесустің баласымен отау құрған. Ал Дәулет Тұрлыхановтың жары – Ардақ белгілі ақын, айтыс жанашыры Жүрсін Ерманның қызы.
