Екі қытайлық арнайы қызмет өкілін «сатып» алмақ болыпты
Атырауда екі Қытай азаматы «2 млн теңгеге ұлттық қауіпсіздік комитетінің қызметкерін «сатып» алуға ұмтылды» деп күдікке ілініп отыр. Бұл туралы ҰҚК баспасөз қызметі хабарлады.
Алматы. NEGE. «2019 жылы 9-қарашада Атырау қаласының арнайы тергеу сотының рұқсатымен ҚР ҰҚК департаменті екі қытайлықты арнайы қызмет өкіліне 2 млн теңге пара беру кезінде ұстап, қамауға алды», – делінген хабарламада.
Арнайы қызметтің дерегінше, олар Атырауда заңсыз жұмыс істеп жүрген шетелдіктің сотта қаралып жатқан ісі оң шешілуі үшін пара бермек болған. Сондай-ақ әрі қарай қамқорлығына алса, ай сайын 200 мың теңге көлемінде ақшалай сыйлық беріп тұруға ұсыныс жасаған. Ұсталғандар кәнісін мойындап отыр. Қазір тергеу амалдары жүруде.
