Екібастұзда жазадан қашып жүрген шетел азаматы ұсталды

Алматы, NEGE. Қылмыстық істің құжаттарына сәйкес Ресей Федерациясының тергеу органының 2023 жылғы 29 мамырдағы қаулысымен күдікті С.-ға іздеу жарияланған. Челябі қаласының орталық аудандық сотының 2023 жылғы 19 қыркүйектегі қаулысымен оған қатысты қамау түріндегі бұлтартпау шарасы сырттай қабылданды.

– Ресей ФедерациясыТергеу комитетінің Челябі облысы бойынша тергеу басқармасы С.-ға қатысты Ресей Федерациясы Қылмыстық кодексінің 105-баптың 2-бөлігінің тармағында, 213-баптың 2-бөлігінде көзделген қылмысты жасады деген айыппен қылмыстық істі өндіруде, – дейді Павлодар қаласының №63 мекемесінің бастығы Берик Рахимов.

Жедел-іздестіру шаралары барысында күдікті Павлодар облысы Екібастұз қаласында ұсталды.

– Тергеу изоляторының арнайы есеп бөлімінің қызметкерлері қажетті құжаттарды дайындады. Қазіргі уақытта экстрадициялық қамауға алынған шетелдік азамат Павлодар облысының “№63 мекеме” РММ-де отыр. Павлодар облысы бойынша қылмыстық-атқару жүйесі департаментінің қызметкерлері қылмыстық қудалау органдарынан қашып, Ресейде кісі өлтіргені үшін іздеуде болған қылмыскерді экстрадициялауға дайындалуда, – деді Павлодар қалалық тергеу изоляторының бастығы.