Джулиани: Трамп кінәлі емес
АҚШ президенті Дональд Трамптың адвокаты Руди Джулиани импичментке қатысты істе президенттің кінәсіздігіне дәлел табылғанын мәлімдеді. Ол мұндай мәліметті Будапешт, Вена және Киев қалаларына жасаған сапарында жинағанын айтты.
Алматы, NEGE. Трамптың адвокаты «жүздеген сағатқа созылған зерттеу мен айлар бойы атқарылған жұмыс нәтижесінде» осындай қорытындыға келгенін твиттерде жазды. Джулиани жұмыс нәтижелерін твиттерде жариялауға уәде берді. Әзірге ол One America Network республикалық телеарнасы үшін түсірілген деректі фильмнің бірнеше ролигін ғана жариялады. Онда Украинаның бұрынғы бас прокуроры Виктор Шокин бар. Ол АҚШ-тың бұрынғы вице-президенті Джо Байден баласының қызметін тергеуге кедергі келтіру үшін өзін қызметтен алуға күш салғанын айтқан. Шокиннің мәлімдеуінше, оны улауға әрекет жасалған.
