Досаев тағы бір қызметке қол жеткізді
Алматының бұрынғы әкімі Ерболат Досаев «Бәйтерек» ұлттық инвестициялық холдингі директорлар кеңесінің құрамына енді.
Астана, NEGE. 26 желтоқсан күні жалғыз акционердің шешімімен қайта сайланған ұлттық холдингтің директорлар кеңесі құрамына Ерболат Досаев та кірген. Қазіргі таңда ол Қазақстан Республикасы Президентінің Әкімшілігі басшысының орынбасары қызметін атқарады.
Қордың директорлар кеңесінің төрағасы – премьер-министр Олжас Бектенов. Сондай-ақ кеңестің жаңартылған құрамына премьер-министрдің бірінші орынбасары Роман Скляр, премьер-министрдің орынбасары – ұлттық экономика министрі Серік Жұманғарин, қаржы министрі Мәди Тәкиев, өнеркәсіп және құрылыс министрі Ерсайын Нағасбаев, холдингтің басқарма төрағасы Рустам Қарағойшин және қор өкілдері кірген.
Айта кетейік, жуырда Ерболат Досаев «Самұрық-Қазына» қоры директорлар кеңесінің мүшесі атанған еді.
Сондай-ақ таяуда экс-әкімнің 2024 жылғы табысы туралы декларация мәліметі жарияланды. Онда Ерболат Досаевтың 14 млн теңгені декларациялағаны көрсетілген. Ал оның жұбайы Гүлнар Досаева 2,3 млрд теңге кіріс алғанын мәлімдеген.
Досаев Алматы қаласын 2022 жылғы қаңтар мен 2025 жылғы мамыр аралығында басқарды.
