Депутат жаңа Конституцияда өлім жазасына тыйым салуды бекітуді ұсынды
Конституциялық реформа жөніндегі комиссияның кезекті отырысында Мәжіліс депутаты Сергей Пономарёв өлім жазасына қатысты ұсынысын жеткізді.
Астана, NEGE. Депутат адам құқықтары жөніндегі уәкіл Артур Ластаевтың «өмір сүру құқығының абсолютті сипатын Конституция арқылы бекіту қажет» деген ұстанымын қолдады.
«Мына норманы енгізу ұсынылады: "Өмір сүру құқығы – әрбір адамның абсолютті әрі ажырамас құқығы. Ешкімнің өз бетінше адам өмірін қиюға құқығы жоқ". Және ең бастысы: "Өлім жазасына тыйым салынады"», – дейді Сергей Пономарёв.
Оның пайымдауынша, бұл норма Ата заңның гуманистік сипатын күшейтіп, Әділетті Қазақстан қағидаты мазмұнын нақтылай түседі.
Айта кетейік, Конституцияның 77 бабына түзету енгізу көзделген. Осылайша Конституция мәтінінің 84%-ы өзгермек.
Конституциялық комиссия мүшесі Бақыт Нұрмұхановтың мәлімдеуінше, жаңартылған Конституция жобасында Преамбула, 11 бөлім және 104 бап бар. «Халық кеңесі» және «Конституцияға өзгерістер мен толықтырулар енгізу» атты екі жаңа бөлім енгізілген. Тағы 4 бөлімнің атауы өзгерген.