Депутат Ермұрат Бапидың үндеуінен кейін Нұрбол Назарбаевқа қатысты іс бойынша тергеу қайта басталды
1 қазанда Мәжіліс депутаты Ермұрат Бапи Қарағанды кәсіпкері Қуат Ерментаевтан арыз түскенін хабарлады. Ол Болат Назарбаевтың ұлы Нұрбол Назарбаев меншігін рейдерлік жолмен тартып алғанын мәлімдеген.
Алматы, NEGE. «Рейдерлік басып алудан кейін ол барынан айырылды. 2022 жылы оның өтініші бойынша Алматы қаласының прокуратурасы мен Экономикалық тергеу департаменті «PORUS» ЖШС-дегі үлесін рейдерлік жолмен тартып алу дерегі бойынша қылмыстық іс қозғаған. Алайда екі жылдан соң іс «қылмыс құрамының болмауына» байланысты тоқтатылған. Бәрі түсінікті, прокуратура Назарбаевтардың айтқанын істеген», — деді депутат.
Ал 9 қазанда тергеу қайта басталғанын Бас прокурор Берік Асылов мәлімдеді.
«Алматы қаласы бойынша Экономикалық тергеу департаменті Қуат Ерментаевқа тиесілі «PORUS» ЖШС-нің жарғылық капиталындағы 16% үлесті заңсыз қайта тіркеу фактісі бойынша (ҚР ҚК 249-бабының 1-бөлігі) сотқа дейінгі тергеу жүргізген. Тергеу қорытындысы бойынша 2024 жылғы 22 ақпанда қылмыстық іс қылмыс құрамының болмауына байланысты тоқтатылған. Алайда материалдар мен Ерментаев ұсынған жаңа дәлелдерді зерделегеннен кейін 2025 жылғы 9 қазанда істі тоқтату туралы қаулының күші жойылды», — деді Асылов.
Қазіргі таңда Алматы қаласы бойынша Экономикалық тергеу департаменті аталған деректерді жан-жақты және объективті тексеру үшін қосымша тергеу амалдарын жүргізіп жатыр.
Іс барысы прокуратура органдарының бақылауында.
Қазір оқып жатыр
Алматы, Шымкент, Түркістан және Ұлытау ЭКСЖ ұлттық жобасы бойынша артта қалды
Бозымбаев: Коммуналдық желілердің тозуын 2029 жылға дейін төмендетуіміз керек
Таразда 19 жастағы қызды алып қашқан Алматы облысының үш тұрғынына үкім шықты
Алматыда полицейлер жүзден астам автобусты айыппұл тұрағына алып кетті
