Денверде 179 адам отырған ұшақ өртенді
Денвер әуежайында ұшу кезінде American Airlines әуе компаниясына тиесілі Boeing 737 Max ұшағының шасси бөлігіне от тұтанып, төтенше жағдай орын алды, деп хабарлайды CBS.
АЛМАТЫ, NEGE. Бортта 6 экипаж мүшесі мен 173 жолаушы болған. Барлығы төтенше сырғанақтар арқылы эвакуацияланды. Бес адамға медициналық көмек көрсетілді, біреуі ауруханаға жеткізілген.
Инцидент салдарынан әуежайда 87 рейс кешіктірілді. American Airlines өкілдері ұшақта ұшу алдында техникалық ақау болып, дөңгелек шинасының зақымданғанын мәлімдеді. Қазіргі уақытта лайнер тексеріске жіберілген.
Пассажирлердің айтуынша, ұшақ ұшу жолағында жылдамдық жинап жатқанда қатты гүрсіл естілген. Айта кетейік, осыған ұқсас жағдай биыл наурыз айында да Денверде American Airlines әуе компаниясының 178 адам отырған ұшағында тіркелген еді.