DEMOSCOPE: Азаматтардың 74,7%-ы азық-түлік бағасының өскеніне алаңдаулы

Астана, NEGE. Зерттеуге қатысқан Қазақстанның 17 облысындағы 1100 респонденттердің 62%-ы бағаның қымбаттауына байланысты ет сатып алуды сиреткен.Тағы 24,5%-ы дәл осы себеппен көкөніс пен жеміс-жидек тұтынуды азайтуға мәжбүр болғандарын жеткізді.

Жалпы, азаматтардың 74,7%-ы кейінгі алты айда азық-түліктің бағасы өскеніне алаңдаулы. 

Сонымен қатар зерттеуде қазақстандықтардың табысының жартысынан көбі (50,6%) азық-түлікке жұмсалатыны айтылған. 

«Сауалнама қорытындысына сүйенсек, респонденттердің 62%-ы бағаның қымбаттауына орай ет сатып алуды сиреткен. Басқа жағынан да үнемдеу байқалады, мысалы: жеміс-жидек пен көкөніс (24,5%), балық (20,5%), сүт өнімдері (16,9%), нан және ұн өнімдері (12,1%), шұжық (11,2%), тәттілер мен сусындар (10,9%). Дегенмен респонденттердің 24,1%-ы әлі де тамақтан үнемдеуге көшпеген және азық-түлікті бұрынғыдай алып жүр»,– делінген зерттеу хабарламасында.

Бір қызығы, осыған қарамастан, қазақстандықтар тамақтың сапасы, қолжетімді болуы және бағасы тұрғысынан азық-түлік қауіпсіздігін айтарлықтай оң бағалайды.