«Дегендеріңе жеттіңдер» – Қорғаныс министрі сарбаздардың өліміне байланысты шенділерді сынға алды

Алматы, NEGE. Әлеуметтік желіде Руслан Жақсылықовтың генелардар мен әскери шенділердің жұмысын сынға алып жатқан видеосы тарады.

«Біз Беларусияға айналып барамыз ба? Әлде жоғары лауазымға қол жеткізіп алған соң босаңсып қалдыңдар ма? Дегендеріңе қол жеткіздіңдер, болды ма? Бірінше кезекте, қоғам сендерден нені талап етеді? Жастардың өмірін сақтап қалу. Сендер алдымен қол астындағы адамдардың өміріне жауаптысыңдар. Олардың жұмыс істеуіне барлық жағдайды жасауларың керек», - дейді Жақсылықов. 

Руслан Жақсылықов Әуе қорғанысы күштері бас қолбасшысының тәрбие ісі жөніндегі орынбасары полковник Талғат Сыздықовтың лауазымын атқарып отырған қызметіне сай емес деп тапты.

Сондай-ақ министр генерал-майор Нұртас Қабақовты Әуе қорғанысы күштерінің қолбасшысы қызметінен босату туралы өтініш беретінін айтты.

«Кешіріңіздер, бірақ мен сіздердің тараптарыңыздан бақылаудың жоқтығын айтып, үнемі нұсқап отыруым керек пе?», – деді министр.