Дастан Сәтпаев «Челси» сапындағы дебюттік голын соқты
Қазақстан ұлттық құрамасының шабуылшысы Дастан Сәтпаев лондондық «Челси» сапында дебют жасап, алғашқы голын соқты.
Астана, NEGE. 17 жастағы футболшы Аустралияның «Вестерн Сидней Уондерерс» клубына қарсы жолдастық кездесуде есеп ашты. Сәтпаев қарсылас қақпасын матчтың 6-минутында дәл көздеді.
Бұл – қазақстандық ойыншының «Челсидің» негізгі құрамында алғашқы минуттан бастап алаңға шыққан алғашқы матчы. Ол команданың маусым алдындағы турнесінде 36-нөмірмен өнер көрсетіп жүр.
Кездесу 28 шілдеде Сиднейдегі «Аккор» стадионында өтіп жатыр. Сәтпаевпен бірге негізгі құрамда Тедди Шарман-Лоу, Джош Ачимпонг, Тайо Субулойе, Тосин Адарабиойо, Лэндон Эменало, Дариу Эссугу, Реджи Уолш, Реджи Уотсон, Лиам Делап және Райан Кавума-Маккуин алаңға шықты.
Дастан Сәтпаев – «Қайрат» академиясының тәрбиеленушісі және Еуропаның топ-5 лигасына кіретін беделді клубпен келісімге келген алғашқы қазақстандық футболшы.