Cудьяны Отанға опасыздық жасағаны үшін соттады
Киевтің Святошинск ауданының соты Қырымның Красногвардейский аудандық сотының судьясын мемлекетке сатқындық жасады деген айыппен 12 жылға бас бостандығынан айырды.
Алматы, NEGE. Бұл туралы елдің Бас прокуратурасы хабарлады. Сот үкімінде аты-жөні көрсетілмеген судья 2014 жылдың наурыз-қараша айларында Ресей билігіне Қырымды басып алуға көмектескен делінеді. Украина соты оны заңсыз басқыншы органдарды құруға атсалысқан және украин билігінің бақылауына кедергі келтірген деп тапқан. Отанға опасыздық жасады деп сотталған судья жалғыз бұл емес. 2019 жылдың шілдесінде украин соты Қырым Автономиялы республикасының Аппеляциялық сотының судьясы Ирина Рыжованы 2014 жылы Ресей жағына өткені үшін сырттай 12 жылға соттап, мүлкін тәркілеген. Бұдан бөлек тағы екі судья дәл осындай айыппен 12 жылға сотталған.
